16.-19. mars, rúmum tveimur vikum eftir að eldgosinu í Holuhrauni lauk fór Svarmi ehf ásamt Jarðvísindastofnun Háskóla Íslands að Holuhrauni. Tilgangurinn var að kortleggja hluta hraunsins með ómönnuðum loftförum. Lagt var af stað inn að Holuhrauni á þriðjudegi frá Mývatni en ferðast var á breyttum jeppum inn eftir og komið til baka á föstudagsmorgni. Aðstæður á svæðinu eru sérstaklega krefjandi fyrir notkun ómannaðra loftfara. Fyrst má nefna í því samhengi að lendingar eru mjög krefjandi þar sem lenda þarf í hrauni og því mikill kostur að geta stýrt loftfari handvirkt inn til lendingar. Sjálfvirkar lendingar væru mjög erfiðar á þessu svæði þar sem mjög lítið er um opin slétt svæði. Gufustrókar sem stíga upp af hrauninu gera myndatöku ennfremur erfiðari þar sem þeir hylja yfirborð hraunsins. Samtals voru flogin átta flug og nokkrir ferkílómetrar hraunsins kortlagðir.

Afraksturinn er m.a. loftmyndir í hárri upplausn, þrívíddarlíkön og hæðarmódel. Vinnsla fer nú fram á gögnunum og er markmið verkefnis að hægt verði að mæla rúmmál og þykkt hrauns, hæð myndana á yfirborði auk þess að þróa aðferðir við gerð þrívíddarlíkana.

Hraunið er á stærð  við Reykjavík alls 84,1 km2 og flogið var yfir nyrsta hluta hraunsins, gígana á sjálfri gossprungunni og suðausturhluta við Jökulsá á Fjöllum.
Jarðvísindamenn áætla að þónokkur breyting muni eiga sér stað á Holuhrauni á næstu misserum og þá sérstaklega á gígunum og verður því áhugavert  að bera þessi gögn við seinni tíma gögn sem safnað verður með ómönnuðum loftförum. Hægt verður að sjá jafnvel minstu breytingar á hrauninu eitthvað sem ekki hefur verið mögulegt áður að gera.

Leave a Reply